Skrywersprofiel_Theresa_van_Baalen

Skrywersprofiel: Theresa van Baalen

Theresa het op nege al besluit dat sy ’n skrywer gaan word. Dit het gebeur nadat sy Enid Blyton se The Secret Seven gelees het.

KOOP HIER | BUY HERE
Twee wêrelde is op die punt om te bots ... Mitch het ’n knop op sy maag, hy weet iéts gaan gebeur. Iets sleg. En dan land die ruimtewesens in Deltaville en ontvoer inwoners van die dorp. Mitch en sy beste vriend, Lionel, besef dat dit hulle taak sal wees om die inwoners te red. Op die planeet Zenkion is Imke besig om oor die Blou Planeet, Aarde, te leer. Haar ma was ’n Aardling en dit beteken Imke is half-Blou Planeter, half-Zenkioniet. Al wat Imke wil doen, is om die blou waters van die Blou Planeet te sien. Sal sy die kans aangryp om na hierdie planeet te gaan? Al is die planeet besig om aangeval te word … Mitch en Imke se wêrelde ontmoet in hierdie verhaal oor ruimtereise, ruimtewesens en ’n soeke na die plek waar elkeen behoort.

Theresa van Baalen is gebore op Uitenhage en het gematrikuleer aan die Hoërskool Brandwag. Sy woon al vir bykans 30 jaar op Port Nolloth, maar het tydelik verhuis na Hermanus ter wille van haar jongste seun se hoërskoolloopbaan.

Theresa het op nege al besluit dat sy ’n skrywer gaan word. Dit het gebeur nadat sy Enid Blyton se The Secret Seven gelees het. Sy kon net nie anders nie. Sy het dadelik geweet dat skryf deel is van haar toekoms. Sy het van toe af stories op haar ma se tikmasjien getik en vandag is sy baie dankbaar dat rekenaars wel ontwikkel is.

Theresa het ná skool eers gedink sy wil graag ingenieurswese studeer, maar gou van plan verander. Sy het kortverhale begin skryf. Een hiervan is deur die tydskrif Sarie aanvaar en geplaas. Hierna het sy jaarliks deelgeneem aan die Baba & Kleuter-tydskrif se kinderstoriekompetisie. In 2004 word sy aangewys as een van die naaswenners.

KOOP HIER | BUY HERE
Vier Sanri Steyn-stories in een omnibus! Sanri Steyn droom daarvan om eendag ’n joernalis te word. En nie sommer enige joernalis nie. Haar naam sal op almal se lippe wees ... Superjoernalis Sanri Steyn. Sy het nie verniet haar eie koerant, die Raaiselfontein Gazette, begin nie. Op die dorpie Raaiselfontein beleef Sanri en haar beste vriend, Markus, allerlei vreemde avonture – as daar nie ruimtewesens oorkant die straat intrek nie, probeer iemand die hele skool se kinders in zombies verander! Die aweregse humor en lekker grillerige avonture in hierdie gewilde reeks sal seuns en meisies vasgenael hou! Vir die eerste keer is die eerste vier Sanri-stories nou in een lekkerlees-omnibus beskikbaar! Dit sluit in: #1: Doktor Zombos se geheime formule Sanri droom daarvan om eendag ’n joernalis te word – en toe sy en haar ma na die klein dorpie Raaiselfontein trek, besluit sy om haar eie koerant te begin. Die Raaiselfontein Gazette sal propvol opwindende nuus wees. Maar sommer gou vind Sanri uit alles is nie pluis op Raaiselfontein nie. Waarom tree almal so vreemd op? En wat het die lekkergoedfabriek daarmee te doen? Saam met haar nuwe vriend, Markus, besluit Sanri om die geheim te probeer ontrafel … # 2: Die aliens oorkant die straat Toe daar nuwe intrekkers oorkant die straat is, begin Sanri se neus kriewel – soos altyd wanneer sy ’n lekker sappige storie ruik. Hoekom trek die nuwe mense een nag tydens ’n woeste donderstorm in? Waarom ry hulle met so ’n vreemde borrelkar? En waarom tree die twee kinders met hulle silwerwit hare so snaaks op? Sanri is seker hulle nuwe bure is aliens. Sy moet net die bewyse kry, anders kan sy vergeet daarvan om ’n storie daaroor te skryf. # 3: Die seun met die superkat-kragte Sanri se neus begin kriewel toe sy die nuwe seun in hulle klas ontmoet. Felix tree baie vreemd op – hy klouter oor mure, eet regte vissies op sy pousebrood ... en hy het ’n ongelooflike geheim! Kort voor lank is daar groot moeilikheid op Raaiselfontein. ’n Nare rotskurk en sy weermag van rotte beplan om die dorp oor te neem. # 4: Die spookmeisie van Raaiselfontein Sanri is teen hierdie tyd gewoond daaraan dat vreemde dinge op Raaiselfontein gebeur. Toe brille links en regs begin wegraak, kry sy dadelik snuf in die neus. Dan maak Sanri en Markus kennis met ’n spookmeisie – en sy het hulle hulp nodig.

In 2009 word drie van haar rympies in die Nuwe Kinderverseboek opgeneem en in September van dieselfde jaar verskyn haar eerste prenteboek Aspris-krokkedis wat nie net met ’n ATKV-kinderboektoekenning vereer word nie, maar ook in 2012 die Tienie Holloway-medalje ontvang. Haar tweede boek, Karla Krullebol, wat in 2010 verskyn, spog ook met die eer van ’n ATKV-kinderboektoekenning.

Sedertdien het Theresa se oeuvre gegroei met die Vakansiepret-reeks, die welbekende Sanri Steyn-reeks waarvan die 9de boek binnekort die lig sal sien en heelwat romanses wat sy onder ’n skuilnaam uitgegee het. Sy gee in 2019 haar eerste tienerroman, Z-A-K: Die blou planeet, uit wat in die wetenskapfiksiegenre val. Haar raad aan enige iemand wat graag suksesvol in die kinderboekmark wil wees is: “As jy dit nie geniet om kinderboeke te lees, rekenaarspeletjies te speel of animasierolprente te kyk nie, vra jouself af of jy REGTIG kinderboeke wil skryf.”

KOOP HIER | BUY HERE
’n Dag saam met die dolfyne op Duinebaai! Jana en Alisha is beste vakansiemaats en groot opwinding heers in Duinebaai – ’n nuwe glyplank is by die swembad opgerig! Jana, Alisha, Tiaan en Rudie is gretig om by die nuwe glyplank af te gly. Ongelukkig vir die maats is die res van Duinebaai ook opgewonde oor die glyplank en is dit stampvol by die swembad. Jana, haar ma en Alisha besluit om eerder roomys te gaan eet en daarna in die see te swem. Asof in ’n droom, swem en speel dolfyne saam met hulle. Dit is beslis die beste dag óóit!

Wanneer Theresa nie skryf nie, hou sy daarvan om kreatief besig te bly met kuns en handewerk. Sy het altyd graag katte geverf, maar vandat sy die wonder en moontlikhede van digitale kuns ontdek het, spandeer sy meeste van haar vrye tyd, as sy nie lees nie, voor haar rekenaar. Sy het ook vir jare vrywillig by die Port Nolloth Museum gewerk. Sy geniet dit om foto’s te neem en spandeer graag tyd saam met haar seuns. Sy is ook ’n kranige rekenaarspeletjie-fundi en lees baie tiener- en kinderboeke, bloot omdat sy dit geniet. Dit help haar ook om die wending van die genres dop te hou.

“Gee vir my ’n boek wat ek nie kan neersit nie, en karakters waarna ek begin verlang as ek daardie laaste bladsy omgeblaai het!”

Leave a Reply

Your email address will not be published. Required fields are marked *

SOSIALE MEDIA

VOLG ONS