Nuwe LAPA Blog FI Karlien Kan nie Kook nie

RESEP UIT: KARLIEN KAN NIE KOOK NIE – Karlien van Jaarsveld en Izelle Hoffmann

JOE SE FILET MET SAMPIOENSOUS EN GROENBOONTJIES

Bestanddele

KOOP HIER | BUY HERE
Resepte só maklik, enigeen kan dit maak! Karlien van Jaarsveld het baie talente, maar kook is nie een van hulle nie. Soos baie ander mense wil Karlien die berge invaar wanneer iemand haar vra: “Wat eet ons vanaand?” Toe kom leefstylsjef Izelle Hoffman met 50 resepte vorendag wat só maklik, lekker en vinnig is dat selfs Karlien dit kan maak! Die gevolg is ’n heerlike resepteboek propvol wengeregte wat jy met min moeite en eenvoudige bestanddele in ’n japtrap kan maak. Karlien kan nie kook nie sluit alles in van familiekos en trooskos tot romantiese etes vir twee en lekkernye vir die kroos. Of jy nou vinnig iets ná werk aan mekaar wil slaan of die Sondag grênd wil onthaal, dié boek gaan elke keer tot jou redding kom. Beïndruk jou gesin en jou gaste met hartlike huiskos wat na baie moeite lyk, maar geen moeite is nie!

Sampioensous
2 e olyfolie
2 knoffelhuisies, geskil en fyngekap
2 swart vars rissie, gekap
hand vol vars roosmarynblare, gekap
hand vol vars tiemieblare, gekap
½ t koljandersaad
300 g wilde sampioene
300 g sjiitake-sampioene
growwe sout
2 e botter
1 rooi-ui, gekap
1 swart knoffelhuisie, fyngekap
½ t sout
1 t tiemie
120 ml sjerrie
500 ml room
50-100 ml melk
1 t mielieblom

Knoffelboontjies
2 e olyfolie
1 knoffelhuisie, fyngekap
600 g dun groenboontjies, punte afgesny
200 g vars ertjies
300 g wilde sampioene
1 e botter
¼ t rissievlokkies
½ t growwe sout
1 t growwe swartpeper
1 opgehoopte t uievlokkies
afronding
sap van ’n halwe suurlemoen

Filet
1 heel filet
1-2 e olyfolie
1 t growwe sout
1 t growwe swartpeper

Metode

Sampioensous: Bereiding 15 min | Gaarmaaktyd 15-20 min
1.Giet olyfolie in ’n dieppot oor warm kole.
2.Roerbraai die fyngekapte knoffel van 2 knoffelhuisies, die rissie, roosmaryn, tiemie en koljander tot geurig. Voeg die sampioene by en roer deurentyd sodat dit nie brand nie. Geur met sout en voeg die botter by sodra die sampioene van kleur begin verander. Roer tot die botter deur die sampioene geabsorbeer is. Skep uit en hou eenkant.
3.Verhit nog olyfolie en braai die ui, 1 swart knoffelhuisie, sout en tiemie.
4.Voeg die sjerrie by en roerbraai tot die ui gekaramelliseer is. Verlaag die hitte en laat dit vir ’n paar minute prut, maar nie droogkook nie. Verwyder van die hitte en laat afkoel.
5.Voeg die room by en plaas terug op ’n lae hitte totdat dit amper begin kook. Voeg die melk by en indien verkies, nog sout en sjerrie. Roer die mielieblom by en laat prut oor lae hitte tot so dik soos verlang.
6.Voeg die sampioene by en roer tot deurgemeng.

Knoffelboontjies: Bereiding 5 min | Gaarmaaktyd 10 min
1.Verhit olyfolie in ’n groot pan op die stoof.
2.Braai die knoffel tot geurig en voeg die res van die bestanddele by.
3.Roerbraai vir sowat 6 minute (die boontjies moet bros bly).
4.Giet suurlemoensap oor voor bediening.

Filet:
1.Smeer die filet oraloor met olie.
2.Braai oor warm kole tot so gaar soos verlang. Geur deurentyd met sout en peper.
3.Sny in dik skywe en seël alkant oor warm kole.
4.Verwyder van die rooster en laat rus in ’n braaibak vir 5 min.
5.Sit voor met sampioensous, groenboontjies en vars ciabatta.

Leave a Reply

Your email address will not be published. Required fields are marked *

SOSIALE MEDIA

VOLG ONS