Onderhoud met Jacolet van den Berg oor haar boek ‘Kate in harmonie’

* Kan jy onthou wat die eerste vonk was wat tot die skryf van Kate in harmonie gelei het?

Ek het ’n paar jaar gelede die inspirerende verhaal van die beroemde perdefluisteraar Buck Brannaman gehoor en toe self oor horse whispering nagelees. Dit het aanleiding tot die perdetema gegee. Toe ek eendag die liriek “Raise your hopeful voice/you have a choice” uit die liedjie ‘Falling slowly’ van Glen Hansard en Markéta Irglové raakluister, het die storie begin vorm aanneem.

* Ry jy self perd, of het jy ’n besonderse liefde/bewondering vir perde?

Ek kan perdry, maar dis nie iets wat ek onlangs gedoen het nie! Ek het perdry weer deur Kate herleef. As elf- of twaalfjarige het ek perdrylesse geneem en in my laerskooldae was ek betower deur perde.

Proestukkie uit ‘As dit proe soos liefde’

by Lapa Redakteur 0 Comments

Lisa glimlag tevrede oor die uitdrukking op oom Hannes se gesig toe hy die eerste happie van die frittata in sy mond het. Hy sukkel om te kou, maar hy kom reg en toe sy die leë bord op die skinkbord neersit en tevrede glimlag, voel dit of sy met ’n Michelin Star beloon is.

 

“Ek kan nie vir jou sê wanneer laas ek iets anders as oats vir ontbyt gehad het nie.”

“Oats is gesond.” Die stem vanuit die deur het ’n vreemde uitwerking op Lisa se hartritme.

“Môre, Johann.”

“Môre, Pa. Ek het kom hoor of ek gou vir Neels moet help om Pa in die bad te kry.”

“Hoekom moet ek bad? Hy was my mos. Ek het in elk geval niks eens gedoen dat ek vuil kan word nie.” Oom Hannes se gesig is weer hard.

“Want dokter Niel kom vanoggend. En Carel het laat weet hy kom later ’n draai maak.”

 

Carel! Daar is egter nie tyd om in die gedagte te baai nie, want Johann het reeds die rolstoel nader gestoot.

“Ek sal dit waardeer as jy solank kan help met sy slaapklere, ek kry sy badgoed bymekaar. Neels, sal jy Pa in die rolstoel help?”

Voor Neels nader kom om Johann se bevele te gehoorsaam gaan sit Lisa by oom Hannes op die bed. Sy laat haar hand op syne rus.

“Ek weet dit is sleg om vir alles in ander se oë te kyk, maar ek belowe ek sal alles in my vermoë doen om seker te maak dit bly nie so nie.”

“Hoe gaan jy dit regkry?”

“Ek weet nie, maar dit sal help as ek weet ek het Oom se samewerking.”

“Dis wat hy ook gesê het.” Hy wys met sy kop in die rigting van die badkamer.

“Dan is hy baie slimmer as wat hy ses jaar terug was.”

Oom Hannes kyk haar in die oë en Lisa kry ’n gevoel hy dink dieper. Hy kom effens regop. “Kom ons hoop so.”

Hy glimlag vir haar voor hy kwaai vir Neels sê: “Moet nou nie onnodig lank draai nie. En as julle my laat val, is die hel los.”

Dis vrees, besef Lisa, wat hom so in opstand laat kom oor die bad. Sy sal vandag met die oom se dokter praat en met Carel se verloofde. Oom Hannes het hulp nodig. Omdat sy besef dat hy boonop selfbewus is oor die hulp wat hy nodig het, tel sy die skinkbord op.

 

“Ek vat die skinkbord kombuis toe. Roep maar as Oom my nodig het.”

 

Ongelukkig kyk sy by die deur terug en haar oë vang Johann se armspiere toe hy sy pa uit die bed tel. Sterk arms, flits die gedagte deur haar kop, arms wat nie sommer ’n vrou sal laat val nie.

 

Lisa sluk droog. Sy moet haar regruk, dit is nie arms wat haar ooit gaan vashou nie. Meer nog, dit is nie die arms wat sy wil hê moet haar vashou nie.

Sjokoladefondant

SJOKOLADEFONDANT uit Smeul

BESTANDELE
Kors
90 g donker sjokolade, gesmelt
30 ml gesmelte botter
500 ml sjokoladekoekiekrummels

Vulsel
300 g donker sjokolade
200 g botter
2 groot eiers
2 groot eiergele
60 g strooisuiker
kakao om oor te sif
geklitste room,
wit roosblare en
kruisementblare

10 Lekker boeke vir die skoolvakansie

by Lapa Redakteur 0 Comments

<h4>10 Lekker boeke vir die skoolvakansie</h4>

 

Die skoolvakansie is hier – en watter beter manier om die jongklomp besig te hou as met ’n lekker boek! Trek ’n lekkerleesstorie of fantastiese feiteboek nader, of vind uit hoe om jou eie slym of ander prettige handwerkprojekte te maak.

 Prinses Klara en die krokodil

Dis nie maklik om ’n prinses te wees nie. Prinses Klara is moeg daarvoor om die heeldag reëls te volg en vervelige boeke te lees. Maar alles verander toe haar towertante op ’n dag vir haar ’n krokodil as geskenk stuur. Prinses Klara en die krokodil besluit om ’n dag lank rolle om te ruil – en daar heers chaos in die paleis!

 Mieke en die meerminne

Mieke is mal oor meerminne. Haar ma en haar ouma dink hulle bestaan net in sprokies. Maar Mieke weet hulle bestaan regtig, want op ’n dag ontmoet sy vir Luna, ’n regte egte meerminprinses. Danksy ’n betowerde skulpkammetjie kan Mieke by die meerminne in hul ongelooflike onderwater-wêreld gaan kuier. Daar is drie heerlike boeke in hierdie reeks: ‘Geheime onder die see’, ‘Die koningin se konsert’ en ‘Avonture in die dieptes’.

Gevaarlike lopies/Duskant die doodlyn

Jong sportliefhebbers sal versot wees op hierdie twee aksiebelaaide stories uit die pen van Jaco Jacobs. In ‘Gevaarlike lopies’ loop Henk-hulle se kriekettoer lelik skeef toe hul paaie met dié van gevaarlike smokkelaars kruis, en in ‘Duskant die doodlyn’ lyk dit of iemand sy mes inhet vir Werner-hulle se rugbyafrigter …

Slym se stories

Fanie Viljoen se Slym-reeks is nie verniet so gewild nie. Sedert die verskyning van die eerste Slym-boek in 2004 het dié oulike wurm en sy aanhangers al hope avonture saam beleef.Slym het die eerste wurm geword wat in ’n paddakonsert gesing het, hy het ’n draai by die gogga-sirkus gemaak, die paddakoning ontmoet en selfs op ’n towertapyt gery! Boonop het hy sommer twee ATKV-Woordveertjies ook ingepalm! Vir die eerste keer verskyn al vier Slym-boeke saam in een pragtige volkleur-omnibus.

Spaghetti tussen jou tone

In hierdie splinternuwe skaterlagstorie uit die pen van Jaco Jacobs vind die twee grootste poetsbakkers in die skool uit waarom dit NIE ’n goeie idee is om met ’n juffrou soos juffrou Zaan skoor te soek nie. Jy mag dalk net die een wees wat spaghetti tussen jou tone kry …

Reënboogrant Maats: Omnibus 1

Een van die gewildste Afrikaanse reekse is nou vir die eerste keer in ’n omnibus beskikbaar! Kom deel in die lekkerste tye van Shani en haar sussie Sunette se lewe – die Reënboogrant-jare! In die Reënboogrant Maats-boeke is Shani-hulle op laerskool, en hulle beleef allerlei opwindende avonture – van ’n dief wat straatnommers steel, tot ’n droomrol in ’n balletkonsert. Hierdie omnibus bevat die eerste drie titels in dié gewilde reeks.

Aksieheld Austin: Nag van grille

Ligte, kamera, aksie! Maak gereed vir nog ’n naelbyt-avontuur in Fanie Viljoen se Aksieheld Austin-reeks. Ewald is ’n jong akteur wat die hoofrol in ’n reeks aksieflieks losslaan – maar hy moet partykeer net so dapper soos ’n regte aksieheld wees om skurke te laat les opsê! Perfek vir jong lesers wat hou van stories propvol aksie en adrenalien!

 Die Slymboek

Hierdie fantastiese boek bevat meer as 30 glibberige, glyerige, grillerige, kleurvolle resepte wat die jongklomp wys hoe maak jy … slym! Maak jou eie Monsterslym met oë binne-in, koes vir die uitbarsting van Vulkaanslym, en lek jou lippe af vir heerlike, eetbare Sjokoladeslym! Al die projekte word met behulp van duidelike stap vir stap foto’s verduidelik.

My ensiklopedie van baie belangrike dinge

’n Fantastiese eerste ensiklopedie propvol feite, perfek vir jong slimkoppe wat nie kan wag om alles oor die wêreld te ontdek nie. ‘My ensiklopedie van baie belangrike dinge’ verken temas soos diere, mense, planete, en baie belangrik, jy! ’n Baie belangrike boek vir baie belangrike mense, en die perfekte eerste naslaanboek vir jong feitevrate.

Knip, verf, plak

Dit is pret om mooi goed van weggooigoed te maak! Hierdie oulike handwerkboek wys jong kunstenaars hoe om vingerafdrukke, voetafdrukke en alledaagse dinge te gebruik om inspirerende, goedkoop en ekovriendelike kuns te maak! Dit wys jou hoe ombotteldoppie-ballonne, ’n stokkie-seerower, diereboekmerke, borrelplastiek-dinosourusse en veel, veel meer te maak. Tegnieke sluit in drukwerk, stempelwerk en eenvoudige collages!

En ons het ook nie van Ma vergeet nie! Daar is vandeesmaand vier splinternuwe Romanzas op die rak.

Proestukkie uit ‘Wie nie waag nie’ – Annetjie van Tonder

by Lapa Redakteur 0 Comments

<h4><a href=”https://www.lapa.co.za/fiksie/romanza/wie-nie-waag-nie/sagteband%20″>Wie nie waag nie</a> – Annetjie van Tonder</h4>

 

Wie nie waag nie – Annetjie van Tonder “Reünie, Nettie? En die nerd van alle mense het jou sowaar gekontak?” Voor haar geestesoog sien sy die yslike bril met die skilpaddopraam op ’n prominente neus. Goeie ou Reuel, die bleeksiel. Nettie lag hartlik. “Ek weet nie hoe die nerd deesdae lyk nie, maar sy stem het verdiep. Klink baie manlik en sterk.” H’m, Gabi kan haar dit nie indink nie. “Hoe het hy jou uitgesnuffel?” “Sy suster is toevallig een van my pasiënte. Sy het hom vertel van haar behandeling by ’n kliniese sielkundige en toe my naam genoem. Dit het ’n klokkie gelui. Ek moes seker destyds darem ook soort van ’n skaduwee gemaak het, want hy het my sowaar onthou. Met jou knaend aan my sy is ek mos meestal misgekyk.”

 

“Komaan, dit was tog nie so erg nie.” Gabi onthou Reuel baie goed. Lank en skraal, met die swaar, byna te groot bril. Sku vir meisies. Altyd met sy neus in die boeke. “Wanneer is die reünie? Waar?”

 

“Die langnaweek oor twee weke, op Reuel se plaas by Tonteldoos naby Dullstroom. Hy het glo akkommodasie vir ons almal. Ek vlieg OR Tambo toe en sal daar ’n huurkar kry, maar wil hoor of ek nie eerder saam met jou kan ry nie? Ek wil nie alleen daar aankom nie.”

 

Ferdie sal natuurlik ook daar wees. Gelukkig laat die naam geen bitter smaak meer in haar mond nie, maar die vernedering toe hy hul verhouding in hulle tweede jaar op universiteit verbreek het, sal haar seker altyd bybly. Sy het sy mooi woorde dat hulle nog kan vriende wees met die minagting behandel wat dit verdien. Vriende wees nadat julle nooi en kêrel was? Ondenkbaar. “Ons is al twintig jaar uit matriek, Nettie. Almal is reeds getroud, behalwe ek. Nee, ek wil nie gaan nie.”

 

“Wil jy nou uitchicken oor Ferdie? Komaan, jong, moenie vir my sê jy is nog nooit oor glamour boy nie? Is hy die rede waarom jy nog mejuffrou is?”

 

Gabi skreef haar oë. Jig, dis natuurlik wat almal by die reünie gaan dink; dis die rede waarom sy nie wil gaan nie! “Nettie, Ferdie en alles wat hy vir my was, lê byna twintig jaar terug in die verlede. Ek is vergete al oor hom. Ek skaam my dood dat ek ooit soos ’n skoothondjie agter hom aangedraf het.” En dis juis dit wat almal by hierdie reünie gaan onthou. Hulle gaan haar en Ferdie met arendsoë dophou. Om van Clio, sy vrou, nie eens te praat nie. “Almal gaan ons dophou, veral om te sien of arme ou Gabi nog steeds net oë het vir Ferdie.”

 

“Ai, my ou maat. Wys hulle dan die teendeel. Jy is ’n bekende en erkende skrywer, jy hoef jou nie aan hulle menings te steur nie. Asseblief, jong. Ek gaan ook alleen. Roux het daardie naweek ’n groot wynveiling. Oorsese kopers en al wat plaaslik belangrik is in die wynbedryf. So, ek is so los as kan kom. Ek wil nogal graag die ou klomp weer sien, maar wil nie alleen daar aankom nie. Ferdie se alie. Ek het juis nooit van hom gehou nie; hy het my altyd so uit die hoogte aangekyk.”

 

Ferdie Fourie. Haar kêrel van toeka. Gabi het nie lus vir hom nie. Veral nie vir Clio nie. Maar as sy gaan, kan sy aan almal bewys sy is lankal oor Ferdie. Dat dit haar nie meer raak dat hy die beeldskone Clio bo haar gekies het nie. Dit was ’n bittere vernedering en sy het lank gevat om daaroor te kom, maar sy het hom gelukkig heeltemal afgesterf. Twintig jaar is darem lank genoeg om oor ’n adolessente verliefdheid te kom. Of is dit nie? Om hom weer te sien sal dalk ’n goeie toets wees. “Ferdie is lankal iets van die verlede, Nettie, rêrig. Ek was tot dusver net te besig vir verhoudings. Maar oukei, ek sal saam met jou gaan.” Nettie hoef nie te weet dat sy haarself doelbewus te besig hou nie. Sy is doodeenvoudig te bang om by ’n man betrokke te raak. Te bang sy is weer nie goed genoeg nie.

 

“Top! Ek gaan nou my vliegtuigkaartjie bespreek. Jy kry my dan by OR Tambo. Ons sal met jou kar moet ry.”